Мақтарал ауданы "Мақталы 1" ауылындағы "Азамат" шаруа қожалығының иесі Тіллә Қалдарбекова "Ырыс" микро кредиттік ұйымынан 4,5 миллион теңге несие алып, бал араны бағуға арналған 2 тіркеме сатып алған.
"Азамат" шаруа қожалығының жұмысын жүргізіп отырған Марат Мұратовтың айтуынша, араның бір ұяшығынан жылына 40 литр бал алады екен. Мұндағы 3 тіркемедегі 300 ұяшықтан жылына 15 тоннаға жуық бал алып жатыр, деп хабарлайды ontustik.gov.kz.
"Аралар суыққа төзбейді. Мақтарал ауданының ауа-райы басқа аймақтарға қарағанда әлдеқайда жылы әрі мұндағы жауын-шашынның аз болуы бал араны бағуға өте қолайлы. Сондай-ақ, кермек, жантақ, жыңғыл, мақтаның гүлі сияқты т.б. аралар нәр алатын өсімдіктер мұнда өте көп" - дейді Марат Мұратов.
Бал араның өніміне деген сұраныс өте жоғары. Балды Мақтаралдың мектептері мен балабақшалары-ақ толықтай сатып алады екен. Өнімнің литрі – 1000 теңге. Тіпті, 4-5 есе қымбат бағаға Қытайдан жүз тонна экологиялық таза балға тапсырыс келген. Қожалық сол сұранысты өтеу үшін жұмыс жасап жатыр. Сондай-ақ, "Техас балы" қауымдастығы да "Азамат" шаруа қожалығының балын жиі сатып алады.
