Қарағанды облысының тұрғыны сатып алған көлігінен ақаулар анықталғаннан кейін автосалоннан 300 мың теңге көлемінде моральдық зиян өндіріп алды, деп хабарлайды inbusiness.kz сайты.
Бұқар жырау аудандық сотының хабарлауынша, әйел адам сатып алу-сату шарты негізінде 9 690 000 теңге төлеп, автосалоннан "JAC" маркалы көлігін сатып алған. Кейін көліктің қозғалыс бөлігінде ақау анықталып, талап қоюшы жауапкерге осы мәселеге қатысты бірнеше рет жүгінген.
Сотпен тағайындалған техникалық сараптама қорытындысының негізінде көлікте зауытпен жіберілген бірнеше ақау анықталды.
27 ақпандағы соттың шешімімен талап-арыз ішінара қанағаттандырылып, автокөлікті сатып алу-сату шарты бұзылды. Көлік сатушыға қайтарылды. Ал талап қоюшының пайдасына 9 690 000 теңге мөлшерінде автокөліктің құны, сондай-ақ 300 000 теңге көлемінде моральдық зиян өндірілді.
Сот шешімі заңды күшіне енген жоқ.
