2016 жылдың қорытындысы бойынша Қытайдың орман шаруашылығының жалпы өнім көлемі алғаш рет 6 трлн юаньнан асып, ағаш өнімдерінің импорты мен экспорты көлемі 136 млрд АҚШ долларына жетті. Осылайша Қытай әлемде ағаш өнімдерін өндіру, саудалау және тұтыну жағынан алғашқы орынға шықты, деп жазады "Казах-Зерно" сайты.
Бейсенбі күні Қытайда орман шаруашылығы басқармалары басшыларының жалпы жиналысында 2001-2016 жылдар аралығында Қытайдың орман шаруашылығының жалпы өнімі 16,6 есеге: 409 млрд-тан 6,4 трлн юаньға өскені айтылды. Қытай орман шаруашылығын дамыту қарқыны жағынан әлемнің барлық елін басып озды, деп атап өтті Синьхуа.
Әсіресе орман туризмінің дамуы ерекше таң қалдырып отыр. Былтыр Қытайда шамамен 9 мың орман туризміне арналған аймақ болды. Оларға жалпы алғанда 1,2 млрд адам атбасын бұрған. Бұл алдыңғы жылмен салыстырғанда 15 пайызға жоғары.
2016 жылы бұл елде жаңадан 21 мемлекеттік орман паркі құрылды. Ал мемлекеттік орман шаруашылығы басқармасы отандық коммерциялық банктермен бірлесіп орман шаруашылығын дамытуды көздейтін 100 млрд юань қаржысы бар инвестициялық қор құрды.
Мемлекеттік орман шаруашылығы басқармасының бастығы Чжан Цзяньлунның айтуынша, үстіміздегі жылы елде орман шаруашылығы нарығына енуге шектеу қоюдың тізбесі әзірленіп, ағаш өнімдерін саудалау орталығы құрылады. 2017 жылы елдің орман шаруашылығының жалпы өнімін 7 трлн юаньға, ал ағаш өнімдерінің импорты мен экспортын 138 млрд АҚШ долларына жеткізу көзделген.
Анықтама үшін: 1 доллар = 332,56 теңге, 1 юань = 48,31 теңге.
