Қытай "Чанчжэн-6А" зымыран-тасығышы арқылы Жердің электромагниттік өрісін бақылауға арналған үш "Яогань-40-02" жер серігін орбитаға шығарды, деп жазады inbusiness.kz сайты.
Қытай аэроғарыштық ғылым және технология корпорациясының хабарлауынша, серіктер Жердің төменгі орбитасында жұмыс істейді. Олар электромагниттік бақылау жүргізіп, жаңа технологияларды сынақтан өткізу үшін пайдаланылмақ.
Модификацияланған "Чанчжэн-6А" зымыраны экологиялық таза керосин мен сұйық оттегімен жұмыс істейді. Ол 500 шақырым биіктікке дейін 6,5 тоннаға дейінгі жүктемені жеткізе алады.
Электромагниттік серіктер жинайтын мәліметтер ғарыштық ауа райын болжау, радиобайланыс пен навигация жүйелерінің тұрақтылығын қамтамасыз ету, сонымен қатар пайдалы қазбаларды барлау және сейсмикалық белсенділікті бақылау үшін қолданылады.
