Қаржылық мониторинг агенттігінің Алматы қаласы бойынша департаменті прокуратурамен бірлесіп, контрабандамен айналысқан компанияның жолын кесті.
Компания ҚХР-дан аса ірі көлемде халық тұтынатын тауарларды Қазақстанға заңсыз жеткізген.
"Сотқа дейінгі тергеу Group of the Companies TDA ЖШС басшылығына қатысты Қылмыстық кодекстің 234-бабы 2-бөлігі 1, 4,5-тармақтарында көзделген экономикалық контрабанда дерегі бойынша істі тіркеді. Фирманың барлық операциялық жұмысын компания директоры атқарды", – деп жазылған Қаржылық мониторинг агенттігі таратқан хабарламада.
Қытайдан заңсыз жеткізлген тауарлардың жалпы құны 585 млн теңгеден асады. Сондай-ақ бюджетке кеден төлемдері мен салықтарын төлеуге жататын сома – 125 млн теңге.
"Биыл 31 наурызда Алматы қаласының мамандандырылған ауданаралық тергеу соты ЖШС директорына қатысты "күзетпен ұстау" түріндегі бұлтартпау шарасын санкциялады", – деп жазылған хабарламада.
Қылмыстық іс жүргізу кодексінің 201-бабы бойынша өзге ақпарат жарияланбайды.
