Апат салдарынан 3 адам ауыр зардап шегіп, ауруханаға жеткізілді. Бұдан өзге 6 адам жеңіл жарақат алған, деп хабарлайды inbusiness.kz.
"Апатқа ауа райының қатты суытып, көктайғақ болып, тұман түсуі себеп болған. Тайғақ жолда бір-біріне соғыла тоқтай берген көліктер үйіліп, жолды жауып тастаған", - делінген хабарламада.
Кейінгі аптада Қытайдың көптеген өңірінде ауа райы аязды болып тұр. Қарлы боран соғып, көлікпен жүру қиындаған, жол апаты жиілеген.
Ұлттық метеорологиялық орталық (NMC) жергілікті өзін-өзі басқару органдарын ауа райына байланысты сақтық шараларын қабылдауға шақырды.
Айта кетейік, Қытайда үскірік аяз бен бұрқасын күннен-күнге үдеп барады. Салдарынан кеше елдегі ең ірі спорттық іс-шара саналатын Ұлттық қысқы ойындар тоқтатылды. Ауа райының қолайсыздығы ел ішіндегі барыс-келісті қиындатып жіберді. Мыңдаған жолаушы жолда қалды.
