Қазақстан мен Қытай делегацияның қатысуымен бейнеконференция форматында селекторлық отырыс өткізіліп, тараптар ҚР мен ҚХР шекаралық темір жолдары бойынша 2020 жылдың 5 айындағы жұмыс қорытындысын шығарды, деп хабарлайды "ҚТЖ-Жүк тасымалы" АҚ баспасөз қызметі.
Сондай-ақ Достық-Алашанькоу және Алтынкөл-Қорғас шекара өткелдері арқылы пойыздар өткізгіштігін арттыру бойынша бірлесе атқаратын іс-қимылдар талқыланды.
Қазіргі таңда Қазақстан аумағында ҚХР-на импортқа арналған өнімдер бар 9 мыңға жуық вагон жинақталып қалды, сондықтан шекаралық станциялар арқылы пойыздар өткізгіштігін арттыруға қажеттілік туындаған.
Биыл бес ай ішінде ҚР мен ҚХР арасында 8 млн тонна жүк тасымалданған.
Онлайн кездесуде тасымал көлемі 2019 жылдың сәйкес кезеңімен салыстырғанда 28%-ға артқаны атап өтілді. Оның ішінде Достық станциясы арқылы 6 млн тонна түрлі жүк тасымалданған, бұл 2019 жылдың қаңтар-мамыр аралығындағы көрсеткішке қарағанда 24%-ға көп, ал Алтынкөл станциясы арқылы 2 млн тонна жүк өткізіліп, оның өсімі 44%-ды құраған.
Селектор барысында таяу уақытта Достық станциясынан Алашанькоу станциясына тәулігіне 16-18 пойыздан жөнелту, ал қабылдау жөнінен тәулігіне 12 пойызға дейін қабылдау бойынша уағдаластыққа қол жеткізілді.
Өз кезегінде қытай тарапы Қорғас станциясының өткізгіштік қабілетін арттыру үшін инвестицияны көбейту жөніндегі жоспарлары туралы мәлімдеді.
