Жаз келіп, сөредегі бағаға өзгерістер еніп жатыр. Еnergyprom.kz сайтының жазғанына сенсек, өткен айда қияр мен қызанақтың бағасы 13-15% түскен. Есесіне қой еті 3%, жылқы еті 2% қымбаттаған. Ал оңтүстіктегі қоймаларда қырыққабаттың жаппай шіруі оның базардағы бағасын 34,6% түсіріп жіберген.
"Мамыр айында жылыжайдан сөреге түсетін қиярдың бағасы 12,9%, қызанақтың бағасы 14,6% арзандады. Ал қырыққабаттың бағасы 34,6% құлдырады. Сарымсақ саудасында былтырдан қалған қор бітіп, биылғы жылдың алғашқы өнімдері сатыла бастады. Оның бағасы 13,3% қымбаттаған. Сол сияқты сәбіз 11,8%, қызылша мен картоп 7,3%-ға қымбаттады", - деп жазылған материалда.
Бір қызығы, сырттан әкелінетін банан, апельсин, лимон бағасы өзімізде егілетін сарымсақ пен картопқа қарағанда көп өспеген.
Бұл халықтың дағдарыс жағдайында жаппай үнемдеуге көшуімен байланысты болса керек. Жеміс-жидек науқаны басталғанда аспандап шыға келетін қанттың бағасы бір айда 0,9%-ға арзандаған.
Шай мен маргарин өнімдері 2% қымбаттаса, ішімдік 2,5% арзандапты. Етпен бірге ұнның да бағасы өскен. Өсім көлемі 3%-тен жоғары.
Есжан Ботақара
