Бұл туралы Бас прокуратураның ресми парақшасы жазды, деп хабарлайды inbusiness.kz сайты.
Астанада тұратын 3 ер адам Telegram мессенджерінде қыздардың жалған аккаунттарын пайдаланып, ер адамдарды кездесуге алдап шақырып, оларды қаладан тыс жерде ұрып-соғып, "масқаралайтын бейнежазбаларды таратамыз" деп қорқытқан.
Қаскөйлер бопсалау арқылы 3 жәбірленушіден жалпы сомасы 2,2 млн теңгені иеленген. Олардың бірін микроқаржылық несие рәсімдеуге мәжбүрлесе, ал екіншісінің автокөлігін алып қойған.
– Сотта мемлекеттік айыптаушы сотталушылардың кінәсін толық дәлелдеді. Сот үкімімен үш сотталушы адам ұрлау және бопсалау қылмыстары үшін 7 жылдан 8 жылға дейінгі мерзімге бас бостандығынан айырылды.
Жәбірленушілердің келтірілген залалды өтеу туралы азаматтық талап-арыздары қанағаттандырылды. Сот үкімі заңды күшіне енді, – делінген ресми мәліметте.
Елорда прокуратурасы азаматтарды әлеуметтік желілер мен мессенджерлер арқылы танысу кезінде сақтық танытуға шақырады. Сондай-ақ, адам ұрлау және ауырлататын мән-жайларда жасалған бопсалау қылмыстары үшін мүлікті тәркілеумен бірге 12 жылға дейін бас бостандығынан айыру түріндегі қылмыстық жауаптылық көзделгенін қатаң ескертіп отыр.
