Бұл туралы ОКҚ алаңында ҚР Президентінің жанындағы Әйелдер істері және отбасылық-демографиялық саясат жөніндегі Ұлттық комиссияның мүшесі Азиза Шөжеева хабарлады, деп жазады inbusiness.kz сайты.
Бағдарламаның мақсаты – қыздардың цифрлық білімін арттыру, кодсыз және төмен кодты бағдарламалау негіздерін үйрету және қыздарды STEM-ге тартуға ықпал ету.
"Бағдарлама аясында қыздар мансапты жоспарлау, құру, сұхбаттан өту және өздері армандаған жұмысқа тұру туралы білім алады. Онлайн режимде өтетін бағдарлама - тегін. Ол 16 мен 25 жас аралығындағы қыздарға арналған", - деді спикер баспасөз конференциясында.
Ал былтыр осыған ұқсас бағдарлама - IT-Aiel жобасы сәтті жүзеге асырылды. 18 жастан асқан жұмысқа орналаспаған 2675 әйел аталған бағдарламаға қатысуға өтініш беріп, No Code School, Freelance School, сондай-ақ негізгі компьютерлік сауаттылық курстарын оқыды.
Өтініштердің басым бөлігі Астана қаласынан және Ақмола облысынан келіп түскен – 847, Алматы қаласы және Алматы облысы – 468, Орал қаласы және Батыс Қазақстан облысы – 275, Атырау қаласы және Атырау облысы 179 өтініш.
"Қатысушылардың орташа жасы 32 жас болды. Бағдарлама қорытындысы бойынша мыңнан астам адам оқуды аяқтап, өз жобаларын, ІТ өнімдерін, сайт немесе қосымша құрып, электрондық растайтын сертификат алды", - деді Әйелдер істері және отбасылық-демографиялық саясат жөніндегі Ұлттық комиссияның мүшесі Алина Әбдірахманова.
