Атырау қаласының мамандандырылған әкімшілік соты жас қызды алып қашқан азаматтың ісін қарады, деп хабарлайды inbusiness.kz сайты.
Іс Әкімшілік құқық бұзушылықтар туралы кодексінің 434-бабы, 1-бөлігі бойынша қаралды.
18 ақпан күні әлеуметтік желіде 22 жастағы атыраулықтың қызды мәжбүрлеп көлігіне отырғызғаны бейнеленген видео тараған болатын.
Сотта анықталғандай, азамат Е. танысы К.-ны көлігіне оның келісімімен отырғызған. Бірақ жолда екеуінің арасында келіспеушіліктер туындап, бойжеткен көліктен түскен.
Алайда ер адам қоғамдық тәртіпті бұзып, қызды күшпен қайтадан көлікке отырғызып, оны үйіне жеткізген.
Жәбірленуші ер адам оны тек үйіне жеткізгенін, оған айтар шағымы жоқ екенін айтқан.
ҚР Әкімшілік құқық бұзушылықтар туралы кодексінің 434-бабы, 1-бөлігіне сәйкес, бұл бұзушылық үшін 20 айлық есептік көрсеткіш мөлшерінде айыппұл салу немесе 5-15 тәулікке дейін әкімшілік қамауға алу жазасы қарастырылған.
Ер адам кінәсін мойындап, өкінетінін айтты.
Сот шешімімен ол кінәлі деп табылып, 78 640 теңге айыппұл арқалады.
Үкім заңды күшіне енген жоқ.
