"Қызылорда" магистральдық газ құбырлары басқармасының бұрынғы басшысының орынбасары 279 млн теңгеден астам қаржыны жымқырғаны үшін сотталды, деп хабарлайды inbusiness.kz сайты.
Бас көлік прокуратурасының хабарлауынша, Қызылорда облыстық соты "Қызылорда" магистральдық газ құбырлары басқармасының бұрынғы басшысының орынбасарына үкім шығарды. Шенеунік қызметтік өкілеттігін пайдаланып, алдау арқылы 279 млн теңгеден астам қаржыны жымқырғаны үшін кінәлі деп танылды.
"Сотталған азамат екі жыл бойы "OrdaGlass LTD" және "HH&B Holding" ЖШС мердігерлік ұйымдарымен қымбат бағамен келісім-шарттар жасасқан. Ол мердігерлерді жаңылыстырып, қаржының көп бөлігі құрылыс-монтаж жұмыстарына жұмсалғанын, сондай-ақ құрылыс материалдарының бағасы айтарлықтай өскенін мәлімдеген", – делінген хабарламада.
Мемлекеттік айыптаушы сотта күдіктінің кінәсін дәлелдеді.
Соталушы 6 жылға бас бостандығынан айырылып, мемлекеттік қызметте және квазимемлекеттік секторда лауазым атқару құқығынан өмір бойына айырылды.
Сот үкімі заңды күшіне енді.
