Қазақстан Республикасы Ішкі істер министрлігі Қызылорда облысында 2012 жылы жасөспірімнің өліміне қатысты қылмыстың ашылғанын мәлімдеді, деп хабарлайды inbusiness.kz сайты.
Қайғылы оқиға 2012 жылдың қазан айында Қармақшы ауданының Жосалы кентінде болған. Топтық төбелес кезінде жасөспірім пышақ жарақатын алып, ауруханаға жеткізілгенімен, көз жұмған.
Оқиғадан кейін төбелеске қатысқандар анықталғанымен, дәлелдер мен куәгерлердің жетіспеуінен қылмыс ұзақ уақыт ашылмай келген.
ІІМ мәліметінше, биыл тергеу-жедел тобының жұмысы барысында басты куәгер анықталып, күдіктіге шыққан. Ол басқа ауыр қылмыс үшін жазасын өтеп жатқан азамат болып шықты. Жиналған дәлелдердің негізінде күдікті кінәсін мойындаған.
Қазіргі уақытта ол қамауда отыр. Қылмыстық іс сотқа жолданды.
