Қызылорда облысында коронавирус жұқтырған әйел аман-есен босанды. Бұл туралы Денсаулық сақтау вице-министрі Ләззат Ақтаева өзінің желідегі парақшасында жазды, деп хабарлайды Atameken Business.
Жүкті әйел 8 сәуір күні түскен. Алғашқыда келіншекке жедел-респираторлы вирусты инфекция диагнозы қойылды. Себебі, денсаулығын бақылау барысында дене қызуы 38,1 градусқа дейін көтерілген. Ал, сovid-19 вирусына тексеру жүргізілген соң, оның инфекция жұқтырғаны анықталды.
Ақхалаттылардың көмегімен науқас баласын аман-есен босанды. Кезекші бригада мүшелері медициналық көмек көрсету кезінде күшейтілген қорғаныш құралдарын пайдаланды. Кезекшіліктен соң олар бірден үйдегі карантинге жатқызылды.
"Нәрестенің салмағы 2 келі 970 гр, бойы 51 см. Баланың денсаулық жағдайы қанағаттанарлық. Нәрестеден де covid-19 вирусына анализ алынды. Әйелді коронавирустан толық емдеп шығару үшін инфекциялық стационарға жатқызылды",– деп жазды Ләззат Ақтаева.
