Жамбыл облысында жолаушылар пойызынан өрт шығып, 34 адам қауіпсіз аумаққа көшірілді, деп хабарлайды inbusiness.kz Рolisia.kz-ке сілтеме жасап.
8 қазан күні сағат 02.45-те көлік полициясына Жамбыл облысындағы "Бурный - Сұрым" өткелінде "Қызылорда – Семей" бағытындағы жолаушылар пойызының электрқондырғы бөлмесінде өрт болғаны жөнінде хабарлама түсті.
"Оқиға орнына көлік полициясының жедел-тергеу тобы жетіп, өртенген вагонның екі жағын дереу ағытты, 34 жолаушыны қауіпсіз вагондарға шығарды", - делінген мәліметте.
Полиция ақпаратына сүйенсек, пойыз бригадасымен бірлесіп, көлік полициясы патрульдік нарядының қызметкерлері Шамиль Керімбаев пен Ержан Майсупов кәсіби шеберліктерін көрсетіп, адам өміріне араша түсті.
"Бірлескен іс-шараның нәтижесінде жолаушылар зардап шеккен жоқ. Аталған факті бойынша тергеу басталды", - делінген полиция мәліметінде.
Сондай-ақ, "Қазақстан темір жолы" ұлттық компаниясы "Қызылорда-Семей" жолаушылар пойызы вагонындағы өртке қатысты комиссия құрып, тексеруді бастады.
Тексеріс жүргізу үшін "ҚТЖ" ҰК" АҚ-да комиссия құрылды", - делінген компания мәліметінде.
