Өткен жылдың желтоқсан айының соңында Мемлекеттік сатып алу порталында “Қаржы лизингі бойынша қызметтер (50 автобус)" лоты пайда болды. Тапсырыс беруші – "Қызылорда" Автобус Паркі" ЖШС. 28 желтоқсан күні өтінімдерді қабылдау басталып, 2023 жылдың 7 қаңтарында аяқталды. Тендерді ҚР ИИДМ Өнеркәсіпті дамыту қоры жеңіп алды.
Лоттың құжаттамасында көрсетілгендей, "QazTehna" ЖШС (Қарағанды облысы, Саран қ.) өндірген Yutong ZK6852HG маркалы 50 автобус сатып алуға қосымша құн салығынсыз 2 млрд 912 млн теңге бөлінді.
Бір автобустың құны ҚҚС-сыз 47 млн 800 мың теңге деп белгіленді. Яғни 50 автобус үшін 2 млрд 390 млн теңгені құрайды.
Аванс сомасы – 478 млн теңге. Негізгі борыш сомасы – 1 млрд 912 млн теңге (ҚҚС-сыз). Сыйақы сомасы – 518 млн теңге (ҚҚС-сыз). Автобустарды қабылдау-беру және мониторинг рәсімдеріне – 3,5 млн теңге.
Лизинг мерзімі – 7 жыл. Бұл ретте лизинг мерзімі лизинг беруші автобустарды лизинг алушыға уақытша иеленуге және пайдалануға берген күннен бастап кемінде 36 айды құрайтын болады. Лизинг бойынша сыйақы мөлшерлемесі – жылдық 7%-дан аспайды.
Ақпаратқа сәйкес, қоғамдық көліктерді Қызылордаға мемлекеттік сатып алу туралы шарт жасалған күннен бастап 6 ай ішінде жеткізу қажет.
Yutong ZK6852HG моделінің кепілдік мерзімі – 18 ай.
Автобустарда 20 орын, газға арналған қозғалтқыш, 5 бейнебақылау камерасы, ГЛОНАСС жүйесі, валидаторлар мен GPS-ке арналған сымдар, пандус және т.б. болуы қажет.
2022 жылы Қызылорда облысының әкімдігі ҚР ИИДМ Өнеркәсіпті дамыту қоры арқылы 150 жаңа автобус сатып алғанын хабарлаған еді. Оған 1 млрд 430 млн теңге бөлінген. Яғни әр автобустың құны – 9,5 млн теңге.
Биыл тағы 150 автобус сатып алу жоспарланып отыр. Бұл мақсаттарға 1 млрд 434 млн теңге бөлінбек.
