"Аристондар мекені" атауынан арылуға 11 миллиард қаржы бөлініп отыр.
Бұған дейін Қызылорда республикадағы ыстық су мәселесі шешілмеген бірден-бір аймақ болатын, деп хабарлайды inbusiness.kz тілшісі.
Биыл Мемлекет басшысының қолдауымен Үкімет резервінен 11 млрд теңге қаржы бөлініп, 186 көпқабатты үйлерге ыстық сумен жабдықтау жұмыстары жүргізілуде.
Бүгін шаһарда алғаш рет сол жақ жағалаудағы №34-ші көпқабатты үйге ыстық су берілді. Апта соңына дейін Астана мөлтек ауданындағы 13 үйге ыстық су жеткізелетін болады.
Бұл туралы "Байқоңыр" әлеуметтік-кәсіпкерлік корпорациясының Ыстық сумен жабдықтау басқармасының басшысы Бауыржан Кушенбаев мәлімдеді.
– Қалған 172 үйдің өжіресіне бүгінде құбырлар толығымен тартылып, ендігі кезекте пәтерлерге есептегіш құралдар мен тіреуіштер орнатылуда. Дайын үйлерге ыстық су осылай кезекпен қосыла береді. Жалпы, қала бойынша ыстық су толығымен жылдың соңына дейін іске қосылатын болады, - дейді ол.
Айта кетейік, ыстық сумен жабдықтау жұмыстары қаламызда екі кезеңмен жүргізіледі. Бірінші кезең бойынша биыл – 186 үй, екінші кезеңде 2025 жылы 250 үй орталықтандырылған ыстық сумен қамтылады. Сондай-ақ, ыстық су тек жылу маусымында ғана емес, қысы-жазы толығымен қамтамасыз етіледі.
