Қытымыр қыста Қызылордада бензоталон іздеген таксистер көп. Соның бірі Марат бірнеше күннен бері АИ-92 маркалы бензиннің тек талонмен беріліп жатқанынан қынжылады. Адам тасып ас-суын айырып отырған таксишілер тіпті жарнама сайттарына да талон сатып алатынын орналастырып қойған деседі.
- Бұрын такси болып тентірейтін едік, енді талон іздеп тықақтап жүрміз. Такси болмақ түгілі, бала-шағаны мектепке апарып келудің өзіне жанар-жағармайымызды үнемдеп жүрміз. 92-ні талонға ғана құяды, 20 теңгеге қымбат болса да, амалсыз 95 құясын сосын, - дейді аты-жөнін толық айтқысы келмеген Марат.
Бұл қаладағылардың "әңгімесі", ал ауылдағы автосы барлардың жүрісі бұл кезде сирей бастаған. Жанар-жағармайдың тапшылығы май құю бекеттерінде емес екенін айтқан әкімдік маманы, облысқа мұнай өңдеу зауыттарынан қажетті мөлшерде шикізаттың жеткізілмеуінен тапшылық туындаған дейді.
- Бұл мәселе облыс әкімдігінің тұрақты бақылауында. Негізгі мәселе, мұнай тасымалдаушы вагондардың жетіспеушілігінен туындап отыр. Бүгінгі күні ҚТЖ мен Энергетика министрлігімен тиісті жұмыстар жүргізілуде, - деді облыстық кәсіпкерлік және туризм басқармасының өкілі Айдос Айсауытов.
Нұрбек Дәуренбеков
