Қызылордалық полицейлер есірткісі бар өсімдік өсірумен айналысқан 21 адамды құрықтады. Оның ішінде алтауы қамауға алынды, деп жазады inbusiness.kz Polisia.kz сайтына сілтеме жасап.
Ақпаратқа сәйкес, 1 маусымда басталған іс-шарада облыс бойынша барлығы 38 есірткі құқық бұзушылықтары анықталды.
"Оның ішінде 17 дерек есірткі өсіру, 2 дерек есірткі өткізу, 1 дерек аса ірі мөлшерде сақтау және 18 дерек есірткіге байланысты қылмыстық теріс қылықтар. Заңсыз айналымнан 7 келі марихуана және 366 келі каннабис өсімдігі алынды. Есірткі өсірумен айналысқан 21 адам құрықталып, оның 6-ы қамауға алынды", - делінген хабарламада.
Бұдан бөлек Қазалы, Сырдария, Шиелі аудандарының далалық аймағынан ірі есірткі алқаптары анықталған.
Айта кету керек, есірткі қылмысының жолын кесуге бағытталған "Қарасора – 2023" іс-шарасы 31 қазанға дейін жалғасады.
