Қызылорда облысының әкімі Нұрлыбек Нәлібаев Аэроғарыш комитеті төрағасының орынбасары Ерден Ибраев және "Инфракос" ШЖҚ РМК бас директоры Назар Көптілеуовпен кездесті, деп жазады inbusiness.kz сайты.
Кездесу барысында "Бәйтерек" ғарыштық зымыран кешені құрылысының барысы мен аймақта туризмді дамыту мәселелері талқыланды.
Өткен жылы Қызылорда облысына жұмыс сапарымен келген Үкімет басшысы Олжас Бектенов "Бәйтерек" кешенінің құрылысымен танысқан еді. Аймақ басшысы жобаны уақытында аяқтаудың маңыздылығын атап өтті.
"Бәйтерек" ғарыштық зымыран кешені Қазақстан мен Ресейдің бірлескен жобасы ретінде құрылып жатыр. Оның құрылысы 2028 жылдың мамырында аяқталуы тиіс, ал алғашқы ұшу сынақтары 2025 жылдың соңына жоспарланған. Кешен жылына 6-8 зымыран ұшыруға мүмкіндік береді. Бұл жоба "Байқоңыр" ғарыш айлағының белсенді жұмысын қамтамасыз ету және қала тұрғындарын тұрақты жұмыспен қамтамасыз ету үшін аса маңызды.
Сондай-ақ, туризмді дамыту және "Байқоңыр" кешенінің мәдени әлеуетін пайдалану бағытында жұмыстар жүргізіліп жатыр. Қазақстан жағынан туристік қызметті "Бәйтерек" БК" АҚ және "Инфракос" РМК ұсынады. Қазіргі уақытта қалаға және ғарыш айлағына электронды түрде рұқсат алу, сондай-ақ "Байқоңыр" кешенінің туристік нысандарына баруға өтінім беру мерзімін қысқарту мүмкіндігі қарастырылуда.
