Сырдың сол жағалауын игеру бас шаһардың көркіне көрік қосары анық. Қызылорда ендігі жерде жаңа жоспар аясында дамып, ірі өзеннің жайлы микроклиматын, табиғи әсем көрінісі мен тартымдылығын тиімді пайдаланбақшы.
Яғни, қолданыстағы бас жоспар бойынша мұнан былай өзен қаланың сәулетіне сән беретін болады, деп хабарлайды ҚазАқпарат ХАА.
Ал сол жағалаудағы аумақ 15 ауданнан құралады. Оның 11-і тұрғын аудан. Бұған қоса, 1 индустриалдық аймақ, 3 ірі парк салынады. Бульварлар салу да қаралған. Бес тұрғын ауданның құрылысына орта қабатты үйлер салу жоспарланып отыр. Әрбір шағынауданның ішінде мектептер мен балабақшалар бой көтереді. Тұрғындар санының қазіргі динамикалық өсуі есепке алынған. Заманауи талаптарға сай ірге көтеретін жаңа қоныста 154 мыңнан астам халық тұрады деп болжануда. Жалпы, тұрғын үй құрылысы 3 млн шаршы метрді құрайды. Бұған қоса, онда 46 балабақша мен 23 мектеп болады. Мұнымен бірге 2 көпсалалы аурухана, қарттарға арналған пансионат, интернат емханалар, күндізгі стационарлар мен дәріханалар салу да қарастырылған. Үлкен ән аренасы, 4 этнографиялық музей кешені, Қорқыт ата интерактивті музейі, балалар шығармашылығы сарайы, саз мектебі мен цирк, драма театры, "Құстар әлемі" оранжереясы мен Медиа орталығы жаңа қонысқа өзіндік ажар қосатын болады. Сонымен қатар 15 мың көрерменге арналған спорт кешені, жеңіл атлеттерге арналған манеж, спорт академиясы мен жүзу бассейні салынады.
