Мұндай сүйінші жаңалықты Үкімет басшысының өзі айтты, деп хабарлайды inbusiness.kz сайты.
Премьер-министр Олжас Бектеновтің сөзінше, Қызылордан Үшқұдыққа дейінгі маршруттың жалпы ұзындығы 320 шақырымға созылады. Қазақстан аумағында 140 шақырым болса, Өзбекстандағы ұзындығы – 180 шақырым. Сондай-ақ, шекарада құны 15 миллиард теңгеге жуық автомобиль өткізу пунктін салу жоспарланып отыр.
Олжас Бектенов ұлттық инфрақұрылымдық жоспарға сәйкес, 2029 жылға дейін Ақтөбе – Хромтау және Қарағанды – Жезқазған жолын жөндеу, сондай-ақ Астана Ырғыз жаңа трассасын салу жоспарда тұрғанын жеткізді.
– Бекітілген жоспарлар мен көлік инфрақұрылымын жаңғырту бойынша жүргізіліп жатқан жұмыстарды ескере отырып, ғылыми өлшеу шеңберінде көзделген жобаларды іске асыру аяқталғаннан кейін Қызылорда – Үшқұдық автожолын салу мәселесін қаралады, – деді ол.
Еске салайық, осыған дейін сенаторлар Қазақстан мен Өзбекстан арасындағы саяси-экономикалық және мәдени байланыстар нығайып келе жатқанын алға тартып, қос ел арасына жаңа жол қажет екенін айтқан-ды. Мұндай сұраныстар мен ұсыныстарға шекара маңындағы аудандардың тұрғындары да үн қосты.
Депутаттар Өзбекстан басқа елдер арқылы балама маршруттар жасамай тұрып, құрылысты мүмкіндігінше тезірек бастаудың маңыздылығын бірнеше рет мінберде көтерді.
