"Атамекен" ҰКП мен білім және ғылым министрлігі қыркүйек-желтоқсан айлары аралығында 50 мыңға жуық студентті кәсіпкерлік негіздеріне оқытуды жоспарлап отыр. Бұл студенттерді республика бойынша арнайы біліктілік курстарынан өткен 821 оқытушы оқытпақ.
Биыл Қызылордада 107 орта мектеп пен мемлекеттік жоғары және кәсіптік техникалық оқу орындарында оқушылар мен студенттерге кәсіпкерлік негіздеріне оқытылатын болды. Аймақта аталған пән бойынша оқытатын мұғалімдер мен оқытушыларға әдістемелік бағыт-бағдар беруге арналған оқыту курстары өтті.
Оқу курсы барысында оқытушылар маркетингтік зерттеу жүргізу, анализ жасау, бизнес-модель, жоспарлау, кәсіпкерлік мәдениет тақырыптары бойынша білім алды.
"Мектеп оқушылары мен студенттерді кәсіпкерлік негіздеріне оқыту арқылы жастардың жоспарлау, талдау жасау, шешім қабылдау қасиеттерін дамытуды, болашақта жеке кәсібін ашуға ниетті азаматтар қатарын арттыруды көздейді. Біздің бизнес-тренерлеріміз 3 ай көлемінде мұғалімдер мен оқытушылардың оқу бағдарламасына, өткізу әдісіне сүйемелдеу жүргізетін болады. Осылайша, "Атамекен" ҰКП ұстаздарға әдістемелік қолдау көрсетуді жоспарлап отыр", - дейді Кәсіпкерлер палатасының сарапшысы Гүлмира Әлназарова.
Айта кету керек, "Кәсіпкерлік негіздері" пәні Қызылорда облысы кәсіпкерлер палатасының бастамасымен 2014 жылы пилоттық негізде Қызылорда қаласындағы №9 мектеп-гимназиясында енгізілген болатын. Жобаның тиімділігі ескеріле келе "Атамекен" ҰКП мен білім және ғылым министрлігінің бірлескен жобасы ретінде республиканың барлық мектептеріне енгізу жөнінде шешім қабылданды.
Енді бұл пән жоғарғы және орта арнаулы оқу орындарының 3-4 курс студенттерінің оқу бағдарламаларына да енгізілмек.
Нұрбек Дәуренбеков
