Қазақстандық Алтынкөл шекаралық станциясы арқылы Лодзь (Польша)-Ченду (ҚХР) контейнерлік пойызы тұңғыш рет өткізілді. Теміржол жылжымалы құрамы қырық футтық 41 контейнерден тұрады. Олар "Қорғас-Шығыс қақпасы" АЭА құрғақ портында өңделді, деп хабарлайды "Қазақстан темір жолы" ҰК" АҚ баспасөз қызметі.
"Польшадан Қытайға қатынайтын контейнерлік пойыз ендігі жерде тек Алтынкөл станциясы арқылы тұрақты жүретін болады", - дейді "KTZ Express" АҚ контейнерлік тасымалдау департаментінің директоры А. Кәрімов.
Оның айтуынша, халықаралық жүк ағындарын Достық-Алашаңқай мемлекетаралық шекаралық өткелінен Алтынкөл-Қорғас бағдарына алмастыру жылжымалы құрамды тар табанды (1435 мм) жолдан кең табанды (1520мм) жолға алмастырып, өңдеу мерзімін азайтады. Сонымен қатар кедендік ресімдеуді жеделдетеді.
А. Кәрімов "Қорғас-Шығыс қақпасы" АЭА құрғақ портының инфрақұрылымы мен Алтынкөл станциясы ірі көлемдегі Қытай-Еуропа-Қытай бағдарындағы жүк ағынын өңдеуге әзір екендігін хабарлады.
"Қорғас-Шығыс қақпасы" АЭА арқылы халықаралық жүк ағынын дамыту Қазақстан аумағы арқылы өтетін халықаралық көлік дәліздерінің санын көбейтіп, бәсекелестікке сай тасымалды қамтамасыз етуге серпін береді.
2017 жылы Қытай-Еуропа-Қытай бағдарына Қазақстан аумағы арқылы 201 мың ЖФЭ транзиті өтті. Ал 2018 жылы бұл межені 346 мың ЖФЭ жеткізу жоспарланып отыр.
