Жеңіл рельсті транспорт жүйесін салу кезінде 5 млрд 800 млн теңгеден артық бюджет қаржысын жымқыру фактісі бойынша 7 күдікті жауапқа тартылуда, деп хабарлайды Atameken Business.
Алайда аты шулы істің басты фигуранттары – елорда әкімінің бұрынғы орынбасары Қанат Сұлтанбеков пен "Астана LRT" басқарма төрағасы Талғат Ардан сотқа қатыспады. Қос күдікті "қамауға алу" шарасы бойынша әлі күнге дейін халықаралық іздеуде. Тергеу органдарының мәліметінше, шенеуніктер кәсіпкерлермен бірге жоба құнын жасанды түрде қымбаттатып, жалған кәсіпорындардың көмегімен миллиардтаған ақшаны қалтаға басқан.
Бүгін прокурор 267 беттен тұратын айыптау актісін оқыды. Қылмыстық істің материалдарында қала әкімінің бұрынғы орынбасарының есімі жиі кездеседі. Прокурордың айтуынша ұйымдасқан қылмыстық топты құрған және барлық бұйрықтарды берген ауқымды жобаға тікелей жауапты болған – Қанат Сұлтанбеков.
