Халыққа есеп беру кездесуінде мәдениет және спорт министрі Ақтоты Райымқұлова осылай деді.
Оның сөзінше, 2020 жылғы 1 қаңтардан бастап мәдениет және өнер ұйымдары қызметкерлерінің жалақысы республикалық деңгейде 50%-ға, ол орта есеппен алғанда 96 мыңнан 139 мың теңгеге дейін, өңірлерде 35%-ға, сәйкесінше 96 мыңнан 126 мың теңгеге дейін өсті.
"Мұндай өсім шамамен 34 мың адамды қамтыды", – деді Ақтоты Райымқұлова.
Министрдің мәлімдеуінше, биылдан бастап кәсіптік қызметін тоқтатқан және кәсіби еңбек өтілі кемінде 20 жыл болатын балет әртістеріне ай сайын соңғы 3 жылдық орташа жалақысының 60%-ға дейінгі мөлшерінде төлем тағайындалды.
"Әдебиет және өнер қайраткерлеріне, талантты жастарға мемлекеттік қолдауды күшейту мақсатында берілетін Тұңғыш Президент – Елбасының мәдениет саласындағы стипендиясы 240-тан 660 айлық есептік көрсеткішке дейін ұлғайтылды. Жыл сайын ғылым, мәдениет және өнер саласындағы дарынды жастар Қазақстан Республикасының Тұңғыш Президенті – Елбасы қоры премиясының лауреаты атанып келеді. Ерекше мәртебесі бар мәдениет және өнер саласындағы жоғары оқу орындарының профессор-оқытушылар құрамына лауазымдық жалақыларының мөлшеріне 1,75 коэффициенті сақталған", – деді Ақтоты Райымқұлова.
Оның сөзінше, 2023 жылға дейін мәдениет және спорт саласындағы мектеп, колледж педагогтерінің жалақысы жыл сайын 25% ұлғаяды.
"Еңбекақы 2020 жылы 25%, 2021 жылы 50%, 2022 жылы 75%, 2023 жылы 100% өседі", – деді министр.
Қанат Махамбет
