Атом энергиясы жөніндегі халықаралық агенттіктің (МАГАТЭ) сарапшылар тобы Өзбекстанға бес күндік сапарын аяқтады, оның барысында осы елдегі алғашқы атом электр станциясының құрылысының қауіпсіздігіне талдау жүргізілді, деп хабарлайды inbusiness.kz ұйымның баспасөз қызметіне сілтеме жасап.
Өзбекстан елдің оңтүстік-шығысында атом электр станциясын салуды жоспарлап отыр. 2017 жылы Өзбекстан үкіметі Ресей Федерациясымен екі ядролық реактор салу туралы келісімге қол қойды. 2019 жылы Өзбекстан құрылыс алаңын таңдауға кірісіп, кейін сейсмологиялық, метеорологиялық және басқа деректерді жинау үшін бақылау станциясын құрды.
"Миссия Өзбекстан АЭС құрылыс алаңының сипаттамаларына объективті талдау жүргізді деген қорытындыға келді, онда МАГАТЭ қауіпсіздік стандарттарына сәйкес персоналдың, жергілікті халықтың әрі қоршаған ортаның қауіпсіздігіне ерекше назар аударылды", – деді миссия жетекшісі Айхан Алтиньоллар.
Миссия құрамына Франция, Түркия мен Ұлыбритания сарапшылары, сондай-ақ МАГАТЭ-нің екі қызметкері кірді. Олар Өзбекстанның атом энергетикасын дамыту агенттігінің ("Узатом") және тиісті техникалық агенттіктердің аға қызметкерлерімен сұхбат жүргізді, сондай-ақ таңдалған нысанға бір күндік сапармен барды. Сарапшылар деректерді жинау мен таңдалған орынды бақылау кезінде жергілікті мамандар "керемет жұмыс" жасады деген қорытындыға келді.
"МАГАТЭ миссиясының сапары - ең жоғары халықаралық қауіпсіздік стандарттарына жауап беретін Өзбекстанның атом энергетикасын дамыту бағдарламасының ажырамас бөлігі. МАГАТЭ сарапшыларының кеңестері бізге осы стандарттарды бірінші АЭС-ті орналастыру мен салу кезінде енгізуге мүмкіндік береді", - деп атап өтті "Узатом" компаниясының ядролық нысандарды салу басқармасының бастығы Джахонгир Абдурахманов.
