ШҚО Мемлекеттік сәулет-құрылыс бақылау басқармасы "Майқапшағай-Қалбатау" тасжолындағы құрылыс жұмысына жоспардан тыс тексеру жүргізді, деп хабарлайды Inbusiness.kz сайты Kazinform агенттігіне сілтеме жасап.
Тексерудің нәтижесі бойынша, орындалған жұмыс бекітілген жобаға және мемлекеттік стандарттарға, оның ішінде құрылымдардың беріктігі мен тұрақтылығын қамтамасыз етуге қатысты нормаларға сәйкес келмейтіні анықталған.
"Мердігер компания бұл жұмыстарды 2016 жылдан бері жүргізіп жатыр. Бұзушылықтарға сәйкес оған ҚР ӘҚБтК-нің 315-бабымен 100 АЕК (345 000 теңге), 312-бабы 1-бөлігімен 700 АЕК (2 415 000 теңге) мөлшерінде айыппұл салынды", - деп жазылған басқарманың хаабрламасында.
Мердігер бұл шешімге келіспейтінін білдіріп, сотқа арыз түсірген көрінеді. Өскемен қалалық әкімшілік құқық бұзушылық істері жөніндегі мамандандырылған соты бұл арызды қанағаттандырусыз қалдырды.
