DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 314,56 Brent 36,55
Мақтаарал: «Салиқалы ұрпақ» қоры 20 үйдің құрылысын бастады

Мақтаарал: «Салиқалы ұрпақ» қоры 20 үйдің құрылысын бастады

20 үйдің құрылысы биылғы жылдың шілде айының соңында толық аяқталып, тұрғындарға табысталады.

24 Мамыр 2020 11:14 136

Мақтаарал: «Салиқалы ұрпақ» қоры 20 үйдің құрылысын бастады

Мақтаарал ауданындағы су тасқынынан зардап шеккен тұрғындарға арналған Мырзакенттегі жаңа шағын ауданнан белгілі меценат Болат Назарбаевтың «Салиқалы ұрпақ» қоры 20 үйдің құрылысын бастап кетті, деп хабарлады  Өңірлік коммуникациялар қызметі.

Бүгінде құрылыс алаңында дайындық жұмыстары жүріп жатыр. Жуырда іргетасы қаланып, үйдің қабырғасы көтеріледі.

«Салиқалы ұрпақ» қорының ресми өкілі Нұрлан Байымбетовтің айтуынша, 20 үйдің құрылысы биылғы жылдың шілде айының соңында толық аяқталып, тұрғындарға кілті табысталады.

«Мырзакенттегі біздің қор атынан салынып жатқан үйлерді жергілікті «Нұр ел» және «Тіней-құрылыс» компаниялар жүргізуде. Қазіргі таңда жерді қазу, құрылысқа дайындық жұмыстары жүріп жатыр. Алдағы күндері іргетасын қалап, 20 үйдің құрылысын шілде айының 20-ы күні толық аяқтауды жоспарлап отырмыз», – деді ол.

Бұдан өзге, қор атынан Мақтаарал ауданындағы ағайындарға көмек ретінде 20 тонна азық-түлік келген болатын. Сондай-ақ, «Салиқалы ұрпақ» қоры судан зардап шеккен жағдайы төмен 100 отбасыға 100 мың теңгеден үлестірмек. Балаларға да базарлық ретінде көпбалалы және аз қамтылған отбасылардан шыққан 20 оқушыны Алматы облысындағы жазғы лагерьлерге жөнелтетін болады.

inbusiness.kz-ті қараңыз, оқыңыз :

Нұр-Сұлтаннан Мақтааралға 40 тонна азық-түлік жөнелтіледі

 Еріктілер су басқан ауыл тұрғындарына көмек көрсетеді.

05 Мамыр 2020 16:08 116

Нұр-Сұлтаннан Мақтааралға 40 тонна азық-түлік жөнелтіледі

Nur Otan партиясы су тасқынынан зардап шеккен Түркістан облысының Мақтарал ауданына 40тонна азық-түлік жөнелтеді. Бұл туралы Jas Otan жастар қанатының жетекшісі Елнұр Бейсенбаев мәлімдеді, деп хабарлайды әкімдіктің баспасөз қызметі.

Сондай-ақ ол су басқан ауыл тұрғындарына көмек көрсету үшін партияның барлық еріктілері жұмылдырылатынын мәлімдеді.

«Қазір Nur Otan Мақтарал ауданына 40 тонна азық-түлік жөнелтеді. Нұр-Сұлтан қаласынан шыққалы тұрмыз. Онда жүзден астам адам жұмыс істейтін еріктілер штабы құрылды. Су тартылған кезде бүкіл еріктілер штабын жұмылдырамыз», – дейді Е.Бейсенбаев.

Jas Otan жастар қанаты жетекшісінің айтуынша, коронавирус пандемиясымен күресте еріктілер туындаған мәселелерді шешуде өздерінің ұйымшылдығы мен бірлігін көрсетуде.

19 наурыздан бастап Елбасы – Nur Otan партиясының төрағасы Нұрсұлтан Назарбаевтың тапсырмасы бойынша «Біз біргеміз» жалпыұлттық акциясы басталды. Оның аясында жасотандықтар 110 мыңнан астам отбасын азық-түлік себеттерімен, сондай-ақ гигиена құралдарымен қамтамасыз етті.

«Алматы, Нұр-Сұлтан және Шымкент қалаларында 5 млн-нан астам маска таратылды. Қазақстан бойынша күн сайын 3 мыңнан астам жалғыз басты зейнеткерлер ыстық тамақ алды. Бұл жұмыстың барлығы еріктілермен атқарылуда. Бүгінде Jas Otan қатарында 3 мыңнан астам ерікті бар, олар бүкіл Қазақстан бойынша жұмыс істейді», – дейді Е.Бейсенбаев.

Еске салсақ, жарияланған науқан аясында «Бipгемiз» қоры құрылып, ол арқылы 360 мың отбасына 50 мың теңгеден бір реттік көмек көрсетілген болатын.
 

Өзбекстанға нота жолданбайды – СІМ

ҚР СІМ ресми өкілі А.Смадияров Түркістан облысындағы жағдайға қатысты түсініктеме берді.

05 Мамыр 2020 14:56 806

Өзбекстанға нота жолданбайды – СІМ

Мақтаралда орын алған төтенше жағдай үшін Өзбекстанға нота жолданады. Бұл туралы Atameken Business-ке сұхбатында Экология, геология және табиғи ресурстар вице-министрі Сергей Громов айтқан еді. Бірақ еліміздің Сыртқы істер министрлігі мәселе өзара келісім мен халықаралық құжат нормалары аясында шешілетіндігін мәлемдеді.

ҚР СІМ 2 мамырда Қазақстан Президенті Қасым-Жомарт Тоқаев пен Өзбекстан Президенті Шавкат Мирзиёевтың телефон арқылы сөйлескенін, екі ел үкіметінің үйлесімді жұмыс атқаратыны туралы уағдаласқанын еске салады.

«Су басу салдарын бірлесіп жою бойынша үкімет пен шекаралас өңірлер басшыларының тығыз өзара іс-қимылын назарға ала отырып, өзбек тарапына ҚР Сыртқы істер министрлігінің нотасын жолдау мәселесі қарастырылмайды»,– дейді Смадияров.

Сондай-ақ, түсініктемеде Түркістан облысының әкімінің өзбек тарапымен қажетті келіссөздер жүргізіп, оның қорытындылары туралы Үкіметтің бүгінгі отырысында баяндағаны айтылған.

«Өздеріңізге мәлім, Премьер-министрдің орынбасары Роман Скляр бастаған Үкіметтік комиссия құрылды. Ертең ол Түркістан облысы мен Өзбекстанға бірлескен іс-қимыл алгоритмін пысықтау үшін барады. Екі тараптың барлық байланыстары толықтай Мәңгілік достық және стратегиялық әріптестік туралы шарттардың және Трансшекаралық су ағындары мен халықаралық көлдерді қорғау және пайдалану жөніндегі Конвенцияның нормаларына сәйкес жүзеге асырылады»,– дейді СІМ өкілі.

Жаңалықтарға жазылу: