Ауыл шаруашылығы министрі Айдарбек Сапаров елімізде мал басының саны өскенін айтты, деп хабарлайды inbusiness.kz сайты.
Ет өндіру көлемі бойынша ең жоғары көрсеткіштерге Алматы, Ақмола облыстары, ал сүт өндірісі бойынша – Солтүстік Қазақстан, Павлодар облыстары қол жеткізді.
"Ауыл шаруашылығы жануарларының барлық түрлері бойынша мал басы тұрақты өсуде. Жыл басынан ірі қара мал басы 23,4%-ға артты (9,6 млн бас), ұсақ мал – 7,8%-ға (26,3 млн бас), жылқы – 12,2%-ға (5,0 млн бас), түйе – 8,5%-ға (321,3 мың бас), құс – 2,2%-ға (47,7 млн бас) өсті", – деді министр Үкімет отырысында.
Айдарбек Сапаровтың айтуынща, өндіріліп жатқан өнім көлемі ішкі нарықты сиыр және қой етімен толық қамтамасыз етуге, сондай-ақ экспорт көлемін арттыруға мүмкіндік береді.
"2024 жылдың қорытындысы бойынша сиыр еті экспорты 1,4 есеге артты және 22 мың тоннадан асты, қой еті – 2,2 есеге өсіп, шамамен 18 мың тоннаны құрады. Жыл басынан өңделген мал шаруашылығында өңделген өнімдері өндірісі артты, оның ішінде шұжық өнімдері – 11,3%-ға, ет консервілері – 27,5%-ға, салқындатылған және мұздатылған қосалқы өнімдер тиісінше 41,9% және 47,1%-ға өсті", – деді АШМ басшысы.
Айта кету керек, бұған дейін ірі қара мен ұсақ мал сатып алғысы келетіндерге жеңілдетілген несие берілетінін жазған едік.
