Қарағанды облысының полицейлері өзгенің малын ұрлап, дәніккендер тобын құрықтады.
Өткен жылдың соңында Қарағанды облысы Бұқар жырау ауданының полиция басқармасына екі ауыл тұрғыны жүгініп, сарайларынан 12 қой мен жылқы ұрланғандығын айтқан. Мал иелерінің әрқайсысына 600 мың теңге шығын келтірілген. Жедел әзірлеменің нәтижесінде полиция қызметкерлері мал ұрлығымен айналысқан топтың ізіне түсті.
19 бен 21 жас аралығындағы алты жігіт оңай олжа үшін осындай қылмысқа барған екен. Ұрланған тұяқтылардың етін сатып, түскен ақшаны өзара бөліскені белгілі болды. Күдіктілердің үйінен тәртіп сақшылары мал терісі мен бір қойды тәркіледі. Төрт адам уақытша ұстау изоляторына қамалды. Қазір қылмыстық топ мүшелерінің басқа да осыған ұқсас қылмыстарға қатысы бар-жоғы тексеріліп, тергеу іс-шаралары жүргізіліп жатыр.
