"Ақ жол" партиясы харассмент және мемлекеттік сатып алу мәселелері бойынша мандатынан айырылған депутаттың орнына кімнің келетінін жариялады, деп хабарлайды inbusiness.kz сайты.
"Партияның Ұлттық кеңесі Серік Ерубаевты мәжіліс депутаты етіп сайлау туралы шешім қабылдады. Серік Ерубаев – партия төрағасының аймақтармен жұмыс жөніндегі орынбасары, VII шақырылымдағы ҚР Парламенті мәжілісінің депутаты. Ол Атырау қалалық мәслихатының III-V шақырылымының депутаты және 2003-2012 жылдары қалалық мәслихаттың хатшысы қызметін атқарған. Сонымен қатар, "Atyrau Construction services ltd" ЖШС-нің бас директоры болып жұмыс істеді", деп жазылған "Ақ жол" партиясының ресми сайтында.
Тиісті құжаттар Орталық сайлау комиссиясына жіберілетін болады.
Айта кету керек, Асқар Садықов депутаттық мәртебесіне лайықсыз әрекеттері үшін қызметінен айырылған.
