Маңғыстау облысында жұмыссыз жүрген жандар ерікті қоныс аудару бағдарламасымен көшіп, материалдық көмек алуына болады, деп жазады inbusiness.kz тілшісі.
Маңғыстау облыстық жұмыспен қамтуды үйлестіру және әлеуметтік бағдарламалар басқармасының басшысы Әсет Шопановтың айтуынша, бағдарлама жұмыссыздықты жою мақсатында жұмыс күші жетіспейтін облыстарға ерікті түрде қоныс аудару үшін квота қарастырылған.
Қандастар мен қоныс аударушыларды қабылдайтын облыстар белгілі.
“2023 жылға қандастармен қоныс аударушыларды қабылдаудың өңірлік квотасына сәйкес Абай, Ақмола, Қарағанды, Қостанай, Павлодар, Солтүстік Қазақстан, Ұлытау, Шығыс Қазақстан облыстары белгіленді. Бағдарламаға қатысушыларға, яғни отағасына және әрбір отбасы мүшесіне бір рет 70 АЕК, 241 500 тенге мөлшерінде көшуге материалдық көмек жаңа тұрғылықты жерге келгеннен кейін беріледі. Мысалы, егер отбасында 6 адам болса, барлығына 1,5 миллион теңге беріледі. Бұл қаржы баспанаға берілетін қаржыдан бөлек болмақ”, - деді Әсет Шопанов.
Өткен жылы осы бағдарламамен Маңғыстаудан көшкендердің барлығы да жұмыспен қамтылды. Бұл екі қолға бір күрек таппай жүрген жандарға үлкен мүмкіндік берді.
Сондай-ақ, Түркіменстаннан келген 20 отбасы, 95 қандас дәл осындай мүмкіндікпен солтүстікке қоныс аударған. Солардың бірі - Мэлс Рымбаев. Ол ерікті түрде Солтүстік Қазақстан облысы, Ақжар ауданы, Восход ауылына 2022 жылы көшті.
“Менің төрт балам бар. Барлығы мектепке орналастырылды. Жергілікті әкімдік киім, тамақ мәселелерімен көмек көрсетті. Баспанамыз бар. Өте жылы. Қазірде газ электр дәнекерлеуші болып қызмет етемін. Айтар алғысым шексіз”, - дейді Мэлс Рымбаев.
Айта кетейік, қалалық жерлерге қоныс аударған бір адам үшін 20 АЕК, 60 000 теңге, отбасы мүшелерінің саны екеуден төртеуге дейін болса 25 АЕК, 86 250 теңге, ал отбасы мүшелерінің саны бесеу және одан көп болған кезде 30 АЕК, 103 500 теңге мөлшерінде төленеді.
Ал, ауылдық жерлерге қоныс аударған бір адам үшін 15 АЕК, 51 750 теңге, отбасы мүшелерінің саны екеуден төртеуге дейін болған кезде 62 100 теңге мөлшерінде, ал отбасы мүшелерінің саны бесеу және одан көп болған кезде 72 450 теңге төленеді.
Ерікті қоныс аудару бағдарламасына қатысушылар тұрғылықты мекенжайы бойынша "Жұмыспен қамту орталықтарына" жүгіне алады.
