27 желтоқсан күні Маңғыстау облысының жүргізушілері Мемлекет басшысына бейнеүндеу жазды. Атап айтқанда, өз бейнеүндеуінде олар кәдеге жарату алымының мөлшерін 100 мың теңгеге дейін төмендетуді сұрайды. Бұл туралы inbusiness.kz сайты lada.kz басылымына сілтеме жасап хабарлайды.
"Біз өз еңбегімізбен ақша тауып, Грузия мен Біріккен Араб Әмірліктерінен автомобильдер сатып алдық. Қазір біз транзиттік нөмірлермен барамыз. Мемлекеттік нөмірді алу үшін кәдеге жарату алымын төлеу қажет. Бірақ оның мөлшері тым жоғары. Кәдеге жарату алымының мөлшерін 100 мың теңгеге дейін төмендетуді талап етеміз. Сондай - ақ, 2022 жылдың 1 қыркүйегінен кейін елге әкелінген автокөліктерді заңдастыруға мүмкіндік беруіңізді сұраймыз", - делінген видеода.
Облыстық полиция департаментінің мәліметінше, жиналғандар тарапынан қоғамдық тәртіпті бұзу фактілері тіркелмеген. Сонымен қоса, Маңғыстау облысының әкімдігі қайта өңдеу мәселесінің оларға еш қатысы жоқ екенін түсіндіріп айтты.
