Маңғыстау облысы Қарақия ауданының прокуратурасы еңбек заңнамасының орындалуына жүргізген талдау нәтижесінде қызметкерлердің еңбек құқықтарының бұзылғанын анықтады, деп хабарлайды inbusiness.kz сайты.
ҚР Еңбек кодексінің 113-бабына сәйкес, жұмыс беруші жалақыны айына кемінде бір рет, келесі айдың бірінші онкүндігінен кешіктірмей төлеуге міндетті.
Тексеру барысында "Тұрмыс-Сервис" мемлекеттік коммуналдық кәсіпорнының 165 жұмыскерге еңбекақыны уақытылы төлемегені анықталды.
Прокурорлық қадағалау шараларының нәтижесінде қызметкерлердің бұзылған құқықтары қалпына келтіріліп, кәсіпорын жұмысшылар алдындағы 29 млн теңге көлеміндегі жалақы берешегін толық өтеді.
Сонымен қатар жалақыны заңда белгіленген мерзімде төлемегені үшін кәсіпорын Әкімшілік құқық бұзушылық туралы кодекстің 87-бабы 1-бөлігіне сәйкес әкімшілік жауапкершілікке тартылып, айыппұл салынды.
Прокуратура азаматтардың еңбек құқықтарын қорғау және еңбек заңнамасының сақталуын қамтамасыз ету бағытындағы жұмыстарды жалғастыратынын атап өтті.
