Сот серіктестік қызметкерлерінің наразылығын заңсыз деп танып, шешім шығарды, деп хабарлайды inbusiness.kz тілшісі.
Қарақия аудандық сотының мәліметіне сүйенсек, Жетібай кен орнының аумағында 9 наурызда сағат 7:00-де наразылық акциясын басталды. Олар өздерінің басшылығына бірқатар талаптар қойды. Қызметкерлер олармен үш жылға еңбек шарттарын жасасуды, инженерлік-техникалық құрамның ұжымын өзгертуді "Ақтаукрантехсервис" ЖШС мен "Трансабис" ЖШС-ні бір заңды тұлғаға біріктіруді, ай сайынғы жалақыны арттыруды, әлеуметтік тұрмыс жағдайларын жақсартуды сұрайды.
Сот жұмысшылапдың еңбек дауларын реттеу жөніндегі Еңбек кодексінің 16-тарауының талаптарын бұзғанын анықтады.
"Атап айтқанда, қызметкерлер жұмыс берушіге ереуіл туралы жазбаша түрде ескертпеді. Оны өткізуге негіз болып табылатын тараптардың келіспеушіліктерінің тізбесін: ереуілдің басталу күні, орны мен уақыты, қатысушылардың болжамды саны, ереуіл өткізу кезеңінде орындалатын қажетті жұмыстар бойынша ұсыныстар көрсетпеді. Сот шешімімен талапкердің талабы қанағаттандырылды. "Ақтаукрантехсервис" ЖШС қызметкерлерінің ереуілі заңсыз деп танылды", – делінеді аудандық соттың хабарламасында.
Шешім заңды күшіне енген жоқ. Ал, жұмысшылар өз талаптары орындалмайынша наразылықты тоқтатпақ емес.
"Біздің талабымыз – осы жылдың қаңтар айында жұмыстан шығарылған 80-ге жуық адамды жұмысқа кері қайтару. Мекемеміз "Маңғыстаумұнайгаз" АҚ аумағында жұмыс істеп жатқандықтан "Қазмұнайгаз" компаниясы еңбекақы төлеудің біріңғай жүйесін қалыптастыруын талап етеміз. Жетібайдағы басшы құрамды түгел ауыстыруды сұраймыз", – дейді жұмысшылар.
Аталған талаптар орындалмаса, ереуілшілер наразылықты облыс әкімдігі ғимаратының алдында жалғастыруға бел буып отыр.
