Сарапшылардың пікірінше, биыл қаңтар айының қорытындысымен нан бағасы бір жылда 19,2% өсті. Ал қара бидай наны 26,5% көтеріліп, бір келісі 435 теңгеге дейін қымбаттады.
Жоғары сұрыпты ұннан бидай наны 27,8%, 348 теңгеге дейін, бірінші сұрыпты ұннан піскен нан 13,9% өсіп, келісі 196 теңгеге дейін қымбаттады, деп хабарлайды inbusiness.kz тілшісі.
Ас атасының бағасы бойынша Қостанай, Маңғыстау, Ұлытау облыстары алдыңғы қатарда тұр. Ең арзан нан - Атырау облысында.
"Қостанай облысында қара бидай наны, Маңғыстау облысында жоғары сұрыпты ұннан, Ұлытау облысында бірінші сұрыпты ұннан жасалған бидай наны бағасының ең жоғары өсуі байқалды", - дейді сарапшылар.
Осы жылдың қаңтар айында елімізде 42,5 мың тонна нан өндірілді. Бұл өткен жылдың осы кезеңімен салыстырғанда 2,3% - ға артық.
Өндірістің ең үлкен көлемі - Түркістан облысында, жылына 10,2 мың тонна. Екінші және үшінші орында 4,5 мың тоннамен Алматы және 4,4 мың тоннамен Ақтөбе облысы тұр.
