"Маңғыстау облысы жұмыссыздық үлесі жоғары өңір болып табылады. Осыған байланысты біздің облыс қандастарды қабылдауға жатпайды. Маңғыстауда этникалық қазақтарға мемлекеттік қолдау шаралары қарастырылмаған. Бізге келген қандастарға жұмыс күші тапшылығы бар солтүстік өңірлерге көшуді ұсынамыз. Бұл өңірлерде олар мемлекеттік қолдау: жұмысқа орналасу, тұрғын үй көмегі, отбасының әрбір мүшесіне біржолғы қаржылық қолдау алады", - дейді Маңғыстау облысының жұмыспен қамтуды үйлестіру және әлеуметтік бағдарламалар басқармасы басшысының орынбасары Досан Жеткізген.
Статистикаға жүгінсек, 1992 жылдан бастап Маңғыстау облысына алыс және жақын шетелдерден 36 мың отбасы, яғни 140 мың адам қоныс аударған. Қандастардың басым көпшілігі Өзбекстан мен Түрікменстан Республикасынан келгендер.
Биыл еліміздің солтүстік өңірлеріне көшіп келуге 1925 қандастан өтініш түскен.
