Маңғыстау облысы Түпқараған ауданындағы Қарақабақ қалашығында археологиялық зерттеулер жалғасып жатыр, деп хабарлайды inbusiness.kz сайты.
Бұл ескерткіш ежелгі халықаралық сауда байланыстары жүйесіндегі Қазақстанның орнын қайта бағалауға мүмкіндік беріп отыр.
"Ғылыми тұрғыдан ерекше қызығушылық тудыратын олжалардың бірі – біздің заманымыздың I ғасырынан VI ғасырдың бірінші жартысына дейінгі кезеңге жататын 150-ден астам тиыннан тұратын коллекция. Олардың қатарында Парфияның, Ежелгі Хорезмнің, Бұхара Соғдысының, Сасанидтік Иранның, Кушан-Сасанид мемлекетінің, Византия империясының және Қытайдың теңгелері бар. Бұл олжалар Қарақабақтың өз дәуіріндегі халықаралық сауда-экономикалық байланыстарға белсенді қатысқанын дәлелдейді", – деді археолог Андрей Астафьев.
Зерттеушілер Қарақабақты Ұлы Жібек жолының тармақтарының бірі және Азов–Каспий сауда дәлізінің маңызды орталығы болуы мүмкін деген болжамды қарастыруда.
"Қарақабақ Маңғыстау тарихы мен Қазақстанның ежелгі халықаралық коммуникациялар жүйесіндегі орнын жаңаша пайымдауға мүмкіндік береді. Археологиялық олжалар бұл өңірдің ғасырлар бойы Шығыс пен Батысты жалғаған сауда жолдарының маңызды буыны болғанын дәлелдейді. Ескерткішті одан әрі зерттеу Ұлы Жібек жолының дамуы туралы жаңа мәліметтер алуға және қазіргі Қазақстан аумағында жүрген тарихи үдерістерді ғылыми тұрғыдан тереңірек түсінуге жол ашады", – деді археолог Андрей Астафьев.
Ғалымдардың айтуынша, соңғы жылдардағы нәтижелер Маңғыстаудың ежелгі құрлықаралық сауда және мәдени байланыстар жүйесіндегі маңызын айқындай түсуде.
