Маңғыстау облысында он ауылдың тұрғындары жайылымды жерлерден айырылып қалды. Себебі, жер учаскесінің иесі онда карьер ашуды көздеп отыр, деп хабарлайды inbusiness.kz тілшісі.
Ал ата кәсіпке ден қойған азаматтар Президенттен көмек сұрайды. Малға беретін су таппай отырғанда, жаздыкүні жайылымның жоқтығы күнкөрісті қиындатып жіберді, дейді.
Мұнайлы ауданындағы малға керек жайылым дауы осыдан бірнеше жыл бұрын басталды. Шаруалар аумақты меншіктеп алған кәсіпкерге қарсы. Өйткені, ол карьер ашуды көздейді. Ал фермерлер жақын маңда басқа жайылым жердің жоқтығын айтады. Шарасыздықтан ел Президентіне үндеу жариялаған.
Мәселе Президентке жетпей, министрлік тарапынан шешілді. Бірақ, шаруалар жағына емес. Өйткені, "Әділет Ақтау" серіктестігі жерасты қойнауын игеру үшін министрліктен рұқсат алған. Ал оған ескерту мен өтініш жасаған жергілікті әкімдіктің қызметкерін сотқа берген. Осылайша, кәсіпкер өз мүддесін сот алдында қорғап шықты.
Төрт түлікті бағып отырған азаматтар мәселені бұлай бей-жай қалдырмаймыз деп бекініп отыр. Аудандық әкімдікпен бірлесіп аппеляциялық шағым түсірмек. Тіпті, жоғары сотқа дейін баруға бекінген. Себебі, жайылымды жердің тағдыры шешілмесе, мал қырылады деп алаңдайды.
