Медициналық ұйымдар басшыларына қатысты өңірде шағымдар мен өтініштердің 31% - ға өскені атап өтілді, оның ішінде негізделген шағымдардың үлесі 46%, деп хабарлайды inbusiness.kz тілшісі.
Атап айтқанда, медициналық көмек пен дәрі-дәрмекпен қамтамасыз етуді ұйымдастыруға, әсіресе амбулаториялық-емханалық деңгейде шағымдардың өсуі байқалады. Денсаулық сақтау министрі Ақмарал Әлназарова Маңғыстау облысындағы бірқатар медициналық нысандарды аралады, сондай-ақ өңірлік денсаулық сақтау басқармасының алқасына қатысты, онда жергілікті халықтың денсаулығын сақтау саласындағы неғұрлым түйіткілді мәселелер талқыланды.
Айталық, Жаңаөзен көпсалалы қалалық ауруханасында 155 мың тұрғын медициналық көмек алады және 650-ден астам қызметкер еңбек етеді, оның ішінде 67 дәрігер бар. Заманауи ангиографиялық аппараттың көмегімен мұнда бірқатар интервенциялық-кардиохирургиялық және нейрохирургиялық операциялар жүргізіле бастады. Тіпті лапароскопиялық, жамбас эндопротезі сияқты күрделі операциялар да жергілікті аурухана деңгейінде жүзеге асырылады.
Министрмен әңгімелесу барысында дәрігерлер шығындардың өзіндік құнын жабуға мүмкіндік бермейтін медициналық қызметтердің кейбір түрлеріне төмен тарифтер белгіленгенін атап өтті. Одан басқа орта және кіші медициналық персоналдың жалақысын көтеру, мамандардың біліктілігін арттыру қажеттігі туралы айтты.
"Биыл соңғы 5 жылда қайта қаралмаған 400-ге жуық клиникалық хаттама жаңартылады. Медициналық көмектің кейбір түрлеріне арналған стандарттар халықаралық, атап айтқанда, персонал санына сәйкес келтірілуі керек. Біз медицина қызметкерлерін ынталандыру тетіктерін көздейтін жаңа кадрлық тұжырымдаманы әзірлеуге кірістік және мұны жеке сектормен жоғары бәсекелестік жағдайында жасауға тура келеді", - деді министр.
Қымбат жабдықты пайдалану, әлеуетін толық пайдалану, жүктемелерді арттыру қажет екендігі атап өтілді
