Мектеп асханасының меңгерушісі Дәметкен Шәкенова Қылмыстық Кодекстің 304-бабы "адамдардың жаппай ауруға немесе улануына әкеп соққан санитарлық ережелерді немесе гигиеналық нормативтерді бұзу" бойынша айыпталып отыр, деп хабарлайды inbusiness.kz сайты.
Еске салайық, былтыр 6 қыркүйекте Мұнайлы ауданы Бесшоқы ауылындағы нөмірі 8-мектепте оқушылар астан уланып, 460 бала ауруханаға түсті.
Тексеру нәтижесінде мектеп асханасынан ішек бактериялары анықталды. 12 қызметкерден стафилококк табылды. Ал ыдыс жуушы дизентерияны тасымалдаушы болып шықты.
Сондай-ақ, жеке кәсіпкердің 10 жылдан бері аталған мектепті ыстық тамақпен қамтамасыз еткені белгілі болды. Енді кәсіпкерге айыппұл салынуы немесе екі жылға дейін бас бостандығынан айыру жазасы тағайындалуы мүмкін.
Айта кететін жайт, осы оқиғадан кейін, еліміздегі мектеп асханаларының бәрі тексерілді. Қылмыстық іс Мұнайлы аудандық сотына жолданған.
