Маңғыстау облысында жыл басынан бері тұтынушылардың құқықтарын қорғау департаменті онлайн дүкеннен алданған азаматтарға 1 394 900 теңге қайтарған. Департамент басшысы Рауан Мұхаевтің айтуынша, жыл басынан бері департаментке азаматтардан 350 өтініш түскен. Оның 120-ы жазбаша болса, 15-і телеграмм бот арқылы, ал 87-і жеке қабылдауда, сондай-ақ, 128-і жедел желі бойынша кеңес алған.
“Департамент мамандары тұтынушылардың өтініштерін қарап, кеңес беріп, көмек көрсетіп келеді. Тұрғындардың басым бөлігі тауар сапасына, айырбастау және кері қайтару, жиһаз жасау және жөндеу жұмыстарына, сондай-ақ тұрмыстық қызмет көрсету деңгейіне көңілі толмай, шағым түсіреді. Көп жағдайда кәсіпкерлер тұтынушылардың жазбаша шағымдарын жауапсыз қалдырады, бұл - басты мәселе”, – деді Рауан Мұхаев.
Тұтынушы құқығын қорғау мақсатында олардың шағымдарын қабылдау, қарау мен жүйелендіруге арналған бірыңғай ақпараттық жүйе- онлайн платформа. Енді азаматтар "Е-тұтынушы" платформасы арқылы онлайн түрде сауда ұйымының өкілдеріне тікелей наразылық жолдай алады.
“Бүгінгі таңда тұтынушылар құқығын қорғау саласы еліміздегі өзекті мәселелердің бірі болып отыр. Оның басты себебі-азаматтардың өз құқықтарын жете білмеуі, қос тарап арасында туындаған шиеленістер мен дауларды шешу кезінде іс-әрекет алгоритмін ескермеуі. Осыған орай өңірімізде 2021 жылы тұтынушылар құқығын қорғау мәселесін оңтайлы шешуге бағытталған бірыңғай ақпараттық жүйе іске қосылған еді”, – деді Рауан Мұхаев.
