Шетпе-Қызан тас жолының Тасмұрын-Мәстек учаскесі, 49-85 шақырымы қайта жаңартуға жатады деп анықталды. Мұнда жол инженерлері ақауларды анықтап, облыстық мемлекеттік сәулет және құрылысты бақылау басқармасына жүгінді. Нәтижесінде техникалық қадағалау сарапшысына ҚР Әкімшілік құқық бұзушылық туралы Кодексінің 317-бабының 3-бөлігі бойынша хаттама жасалды.
Сондай-ақ, техникалық қадағалау жөніндегі аттестаттың қолданылу мерзімі 6 айға тоқтатылды. Ұлттық жол активтері сапасы орталығы қызметкерлерінің араласуымен Құрық-Жетібай автожолының 40-64 шақырымында 9200 текше метр көлемінде қиыршық-құм қоспасынан жасалған трассаның негізі қайта ауыстырылды. Сонымен қатар, Шетпе-Қызан жолының 49-85 шақырымында 7504 м2 асфальт-бетон жабыны ауыстырылғаны белгілі болды.
