"Ұлы дала жорығы" марафон- бәйгесіне қатысқан "Рекорд" командасындағы 21 жастағы Мағжан Абдолұлы 1300 шақырымның соңғы 50 шақырымын бағындыруға таңғы сағат 7:10-да аттанып, Түркістандағы мәре сызығын 08 сағат 44 минут 09 секундта бірінші болып кесті.
Астанадан Түркістанға дейінгі 1300 шақырымды бастан-аяқ 1 атпен еңсеруді мақсат еткен “Рекорд” командасының құрамы Астана қаласы, Маңғыстау мен Жетісу облыстарының шабандоздарынан құралған.
Қазақ жылқысының атын Гиннес рекордтар кітабына енгізуді көздеген азаматтарға төрешілер шешімімен қомақты жүлдеқоры беріледі.
1-орынға - 2,5 млн теңге, 2-орынға - 2 млн теңге, 3-орынға - 1,5 млн теңге
Еске салайық, Маңғыстаудың "Көкмойнақ" командасы 12-кезеңге келгенде жорықты тоқтатқан болатын. Дегенмен Маңғыстаудың Адай тұқымдас тұлпары - Шағырайторы Гиннес рекордтар кітабына енгізу жолында сынға түскен еді. Бүгін шешуші кезеңде Шағырайторы топ бастап, бірінші келіп, рекорд орнатты.
Сондай-ақ, "Ұлы дала жорығы" марафон-бәйгесінің топтық жарыс жеңімпаздары Жетісу облысының командасы атанса, екінші орынды Ақтөбе және үшінші орынды Алматы қаласы иеленді.
