ҚР Ауыл шаруашылығы вице-министрі Ербол Тасжүрековпен кездескен шаруалар ҚТЖ арқылы жем-шөп, ауыл шаруашылығы өнімін тасымалдау тарифін ретке келтіруді және "Ауыл аманаты" бағдарламасының ережесін өзгертіп, талапты жеңілдетуді сұрады.
"Бағдарлама ережесі бойынша 12 құжат тапсыру қажет. Онда да қарыз алушының кепілдігі мүлкі өзінікі болса ғана. Ал өзгенің мүлкін кепілдікке қоятын болса, құжат саны тағы көбейеді. Ал автокөлікке қатысты кепілдік мерзімі - 2 жыл. Дегенмен шілде айында ережелерге өзгеріс енгізілді. Қазір несие алушы тек 8 құжат тапсырады, бизнес жоспар керек емес", - деп түсіндірді облыстық ауыл шаруашылығы басқармасының басшысы Қазбек Ташимов.
Шаруалар өңірде түйе шаруашылығын дамыту бойынша жұмыстардың көзге көрінбейтінін тілге тиек етті. Бұл ретте ауыл шаруашылығы вице-министрі Ербол Тасжүреков жергілікті әкімдік пен шаруа қожалықтары бірлесіп, түйе шаруашылығын дамытуға арналған нақты жоспар, тиімділігін арттыру үшін бағдарлама әзірлеуді тапсырды. Соңғы үш жылдың ішінде 1 трлн теңге қаражат ауыл шаруашылығына бөлінген. Былтыр 450 млрд теңге, биыл 425 млрд теңге қарастырылған. Басты мақсат - азық-түлік тауарларының импортқа тәуелділігін жою.
"Елімізде жеміс-көкөніс өнімдерін сақтау бойынша қажетті инфрақұрылым құру жұмыстары жүргізіліп жатыр. Көкөніс қоймаларын салу және жаңғырту жөніндегі жоспар өзектендіріліп, 2025 жылға қарай қуаттылығы 528,8 мың тоннаға дейін ұлғайту қарастырылған. Сондай-ақ, қазіргі уақытта инвестициялық субсидиялау ережесіне шығындарды өтеу нормативін қолданылатын сақтау технологиясына байланысты 25%-дан 40-50%-ға дейін ұлғайту бөлігінде өзгерістер енгізілуде", - дейді вице-министр.
