Петропавл маңындағы Бескөл ауыл округының әкімі мас күйінде көлік жүргізгені үшін 15 тәулікке қамалды. Алайда ол медициналық тексерістен өтуге қарсылық білдіріпті, деп жазады inbusiness.kz сайты КТК арнасына сілтеме жасап.
"Медициналық сараптама тәртібі бойынша психоактивті заттар қолданғанын және масаң күйін анықтау міндетті болып саналады. Куәландыруға қарсылық білдірген адам кінәлі болып есептеледі. Қолдағы бейнематериалдарда нарколог дәрігердің Қанат Дарбаевке осының бәрін түсіндіріп жатқаны анық көрсетілген. Оның сараптамадан бас тартуы – орта деңгейдегі масаң күймен теңестірілді", - деді судья Динара Рахимберлина.
Ауыл әкімі алкоголь ішкен ішпегенін куәландырудан бас тартқаны үшін 15 тәулікке қамалып, сегіз жылға көлік жүргізу құқығынан айырылды. Алайда шенеунік бұл шешіммен келіспей отыр. "Арақ атаулыдан адамын" деген азамат мұны өз қызметімен" байланыстырып отыр. "Жұмысыма кедергі келтіру үшін жағдайды әдейі ушықтырды" дейді. Сондықтан өзі де сотқа шағымданбақшы.
"Кесілген 15 тәулік мерзімімді өтеп келген соң, жоғары сотқа шағымданамын. Олар да мені айыпты деп таныса, онда Әдеп кеңесі маған не тәртіптік жаза қолданып, не қызметімнен босатады. Бәрін уақыт көрсетеді", - деді Бескөл ауыл округының әкімі Қанат Дарбаев.
