Беларусьтің Ресейдегі елшісі Александр Рогожкин өз еліндегі электр энергиясына сұраныстың артуына түсініктеме бере отырып, республикадағы екінші атом электр станциясының құрылысы аясында Мәскеу мен Минск арасындағы келіссөздердің басталғанын растады, деп хабарлайды inbusiness.kz сайты.
"Қосымша блок немесе басқа АЭС салу мүмкіндігі пысықталуда. Бүгін бұл мәселе Ресей тарапымен талқылануда, бұл оңай шаруа емес", – деді елші.
Александр Рогожкин Беларусьте энергия тұтынудың артуын "өнеркәсіптік өндіріс көлемінің өсуімен, энергияны көп қажет ететін тұтыну өндірістерінің құрылуымен" байланыстырды. Дипломат Ресеймен басқа да инвестициялық жобаларды еске салды.
"Ресей бөлген 105 млрд ресей рублінің несиесі аясында 27 инвестициялық жоба жүзеге асырылуда, олар Одақтас мемлекеттің технологиялық қауіпсіздігін қамтамасыз етуге бағытталған. Бүгін біз Ресей тарапымен станок жасау, авиация жасау, микроэлектроника саласындағы бірқатар жобаларды пысықтап жатырмыз", - деп қосты ол.
