Сенат төрағасы Мәулен Әшімбаев Ақтау маңында болған ұшақ апатынан қаза болғандардың отбасы мен жақындарына көңіл айтты, деп хабарлайды inbusiness.kz сайты.
"Кеше Маңғыстау облысында болған ұшақ апаты бәріміздің қабырғамызды қайыстырды. Өкінішке қарай, апат салдарынан экипаж мүшелері мен жолаушылар қаза тапты. Олардың арасында Қазақстан азаматтары бар екені белгілі. Осыған байланысты барлық қаза тапқандардың отбасылары мен жақындарына қайғыларына ортақтасып, көңіл айтамыз", – деді Мәулен Әшімбаев.
Сенат спикері төтенше жағдайға байланысты Президентіміздің тапсырмасымен мемлекеттік комиссия құрылғанын еске салды.
"Соған сәйкес тиісті органдар дереу іске кірісіп, құтқару операциясы аясында қажетті шаралар қабылданды. Дер кезінде қолға алынған осындай жұмыстар зардап шеккендердің тезірек сауығып кетуіне оң әсерін тигізеді деп сенеміз", – деді Сенат төрағасы.
