Мажарстанның Сыртқы экономикалық байланыстар және сыртқы істер министрі Петер Сийарто Нұр-Сұлтанға ресми сапармен келіп, соның шеңберінде Қазақстан Премьер-Министрінің орынбасары – Сыртқы істер министрі Мұхтар Тілеубердімен екіжақты келіссөздер өтті, деп хабарлайды inbusiness.kz ведомство баспасөз қызметіне сүйене отырып.
Тараптар саяси, сауда-экономикалық және мәдени-гуманитарлық салалардағы Қазақстан-Мажарстан ынтымақтастығын одан әрі кеңейту жолдарын, сондай-ақ Түркітілдес мемлекеттердің ынтымақтастық кеңесі (Түркі кеңесі) шеңберіндегі өзара іс-қимылды талқылады. Өзара қызығушылық тудыратын халықаралық сипаттағы бірқатар мәселелер, соның ішінде қазақстандықтар үшін Еуроодақ визалық режимін оңайлатуға қатысты мәселелер қаралды.
Келіссөздер қорытындысы бойынша бірнеше құжаттарға қол қойылды.
Сауда-экономикалық байланыстарды нығайту мажар министрінің екі елдің 30-ға жуық ірі іскер топтар өкілдерінің қатысуымен Дипломатиялық бизнес-клуб мүшелерімен кездесуінің басты тақырыбы болды.
Сапар барысында П.Сийарто Қазақстан Республикасы Президентінің қабылдауында болады және Сауда және интеграция министрімен кездесу өткізеді, сондай-ақ "Астана" халықаралық қаржы орталығы, Түркі академиясы мен Л.Гумилев атындағы Еуразия ұлттық университетіне барады.
Гуманитарлық ынтымақтастық аясында бүгінде Мажарстанда 1000-ға жуық қазақстандық студент білім алып жатқанын атап өткен жөн. Мажарстан жыл сайын Қазақстан үшін 250 білім грантын бөледі.
